Árshátíð Grunnskóla Drangsness og miðstigs Grunnskóla Hólmavíkur verður haldin dagana 10. og 11. apríl í samkomuhúsinu Baldri á Drangsnesi. Sýnt verður nýtt frumsamið verk Goðdalir sem unnið er upp úr goðafræði og hugmyndum frá nemendum í leikgerð og leikstjórn Kolbrúnar Ernu Pétursdóttur.  Þetta er í annað sinn sem við erum með samstarfsverkefni með Grunnskólanum á Hólmavík, en í fyrra sýndum við leikritið Ævintýraferð að miðju jarðar. 

Fyrri sýning fimmtudaginn 10. apríl kl. 17:00. Miðaverð er 3000 kr. fyrir fullorðna og frítt fyrir börn yngri en 6 ára (veitingar innifaldar). UPPSELT

Seinni sýning föstudaginn 11. apríl kl. 17:00. Miðaverð 2000 kr. fyrir fullorðna og frítt fyrir börn yngri en 6 ára.

Hægt er að kaupa miða við inngangin en það væri gott ef fólk meldaði sig á viðburðinn ef það hyggst koma. Verið öll velkomin.

Miðapantanir eru á skoli@drangsnes.is eða í síma 6635319.

Viðburður á Facebook 10. apríl

Viðburður á Facebook 11. apríl

 

 

Þetta verkefni hefur langan aðdraganda og er samþætt við ýmsar námsgreinar í skólastarfinu hjá okkur. Eftir vel heppnaða árshátíð í fyrra var ákveðið að hafa sama fyrirkomulag í ár. Þá var sótt um styrk í Barnamenningarsjóð og fengum við myndarlegan styrk í þetta verkefni sem gerði það mögulegt að ráða Kolbrúnu Ernu leikstjóra en hún var með okkur í fyrra líka og hefur langa reynslu af því að kenna börnum leiklist. Á haustdögum var byrjað að læra um goðafræði í þema á samstarfsdögum á Hólmavík. Þá fengum við Kristínu Rögnu Gunnarsdóttur listamann og rithöfund til að vera með ritsmiðju með okkur. Út úr þessari smiðju komu ýmsar hugmyndir frá nemendum sem voru nýttar í leikgerðina. Þá vorum við í samstarfsverkefni með Árnastofnun í verkefni sem heitir „Hvað er með ásum“ og voru unnin ýmis myndlistarverk tengd því verkefni og fengum við nýja safnkennarann þar hana Mörtu f.v. kennara hjá okkur, í heimsókn þar sem hún kynnti okkur nýja handritasýningu Árnastofnunar „Heimur í orðum“. Þá fengum við einnig styrk frá Púka barnamenningarhátíð Vestfjarða fyrir slagverkssmiðju sem við nýttum til að fá Hrafnkel Örn – Kela, til okkar í tvo daga að kenna okkur á hljóðfæri sem við svo nýtum okkur í leikritinu. 

Þetta er langt og mikið lærdómsferli sem á sér stað í svona stóru verkefni og það væri engin leið að gera þetta ef við værum ekki með úrvals nemendur, starfsfólk, gestakennara, foreldra og aðra velunnara.

Ásta Þórisdóttir: verkefnisstjóri, leikmynd, ljós

Kolbrún Erna Pétursdóttir: leikstjóri og leikritahöfundur

Heiðrún Helga Hjörleifsdóttir: aðstoðarleikstjóri, umsjón tónlistar og sviðsmaður

Mayra Del: umsjón yngri og búningasaumur

Jóhanna G Rósmundsdóttir: umsjón nemendur frá Hólmavík, leikskrá og búningasaumur

Sigrún Sverrisdóttir: umsjón nemendur frá Finnbogastaðaskóla, leikmynd, búningar of.l. 

Sólrún Trausta Auðunsdóttir: gerð og hönnun á hásætinu Hliðskjálf

Svanur Kristjánsson: bílstjóri, leikmynd, búningasaumur, rafmagn, smíði, reddingar. 

Stefanie Gehringen: búningahönnun og saumur á krummum og íkorna. 

Tekla Þorláksdóttir: matráður

Stephan Kalt: afleysingamatráður og ræsting

Athena Nótt Hermannsdóttir: teikning á auglýsingamynd

 

 

 

Verið öll velkomin á Þorrablót barnanna sem haldið verður í skólanum miðvikudaginn 29. janúar kl. 11:30 – 12:30. Boðið verður upp á þorrasmakk og grínatriði nemenda. Nemendur sýna dans sem þeir hafa æft og kynna lítil vísindaverkefni sem þau hafa verið að vinna. 

 

Laugardaginn 16. nóvember síðastliðinn tóku nemendur Grunnskóla Drangsness þátt í First Lego League keppninni í þriðja sinn. 

First Lego League eða FLL er alþjóðleg Lego keppni sem nær til yfir 600.000 ungmenna á aldrinum 10-16 ára í 110 löndum víða um heim. Upphaf keppninnar má rekja til ársins 1998 þegar Dean Kamen, stofnandi FIRST og Kjeld Kirk Kristiensen frá LEGO® Group tóku höndum saman og  stofnuðu FIRST LEGO keppnina. Markmið keppninnar frá upphafi hefur verið að kveikja áhuga ungmenna á vísindum og tækni. 

First Lego League Challenge hefur verið haldin af Háskóla Íslands síðan árið 2005 en það var haustið 2022 sem lið frá Vestfjörðum og Ströndum tók í fyrsta sinn þátt, en það árið kepptu fjórir nemendur frá Grunnskóla Drangsness í keppninni. Ári síðar bauðst nemendum Grunnskóla Hólmavíkur að slást í hópinn og það árið tóku átta nemendur frá báðum skólum þátt. Sami háttur var hafður á í ár en sex nemendur frá Grunnskóla Drangsness og einn frá Grunnskóla Hólmavíkur skipuðu liðið í ár. Þau Marta Guðrún Jóhannesdóttir kennari við Grunnskóla Drangsness og Bjarni Þórisson hafa verið leiðbeinendur frá upphafi með dyggri aðstoð Ástu Þórisdóttur skólastjóra Grunnskóla Drangsness. Foreldrar og sveitungar hafa sýnt keppninni mikinn áhuga og studdu t.a.m. stofnanir og fyrirtæki duglega við liðið í ár ásamt því sem sífellt fleiri mæta á keppnisdaginn til þess að taka þátt í viðburðinum. 

Árlega er skipt um þema í keppninni, í ár var þemað lífríki sjávar og bar keppnin undirtitilinn Neðansjávar. Nemendur leystu ýmiss verkefni en í FLL er unnið þverfaglega og taka börnin þátt í verkefnum sem skapa færni í vísindum, verkfræði, nýsköpun og tækni. Eitt verkefnanna er að forrita og hanna Legoþjarka (vélmenni) sem leysir þrautir í vélmennakapphlaupi. Það var einmitt í vélmennakapphlaupinu sem nemendur í liði skólanna hrepptu þriðja sætið, yngst allra liða sem tóku þátt að þessu sinni. Það voru því stoltir og ánægðir Strandakrakkar sem sneru heim úr höfuðborginni að keppni lokinni. 

Fyrir þau sem vilja kynna sér keppnina má sækja upplýsingar á heimasíðu hennar https://firstlego.is/keppnin/   

 

 

 

Verið öll hjartanlega velkomin á skólaslit Grunnskóla Drangsness skólaárið 2023 – 2024, föstudaginn 31. maí kl. 12:00 – 13:00.

Skólastjóri fer yfir skólaárið

Nemendur yngri deildar syngja nokkur lög

Samsöngur

Veitingar að lokinni dagskrá

Í tilefni þess að 80 ár eru liðin frá stofnun lýðveldis á Íslandi efna Safn Jóns Sigurðssonar á Hrafnseyri og Þjóðgarðurinn á Þingvöllum til verkefnisins „Heill heimur af börnum – börn setja mark sitt á Íslandskortið.“ Hugmyndin er að hvetja börn til að miðla því sem þeim finnst mikilvægt og áhrifaríkt í lífi þeirra og umhverfi, hvort sem það er fólk, landslag, menning, listir, áhugamál, náttúra eða annað, og koma því til skila á nýju gagnvirku Íslandskorti.

Við í Grunnskóla Drangsness ákváðum að taka þátt í þessu skemmtilega verkefni til þess að gefa öðrum tækifæri til þess að kynnast þorpinu okkar betur. Nemendur á elsta- og miðstigi unnu verkefni um „Hvað er einstakt fyrir staðinn sem við búum á?“ Nemendur á yngsta- og miðstigi unnu verkefni um „Hvað fær okkur til að skína sem einstaklingar“ og „Ef ég væri forseti“. 

Ekki er hægt að sýna frá Drangsnesi nema koma með stutta innsýn inn í starf skólans. Skólinn er einn sá fámennasti á landinu en á þessu skólaári stunda 10 nemendur nám við skólann. Í Grunnskóla Drangsness er lögð rík áhersla á að hampa fjölbreytileikanum og skapa svigrúm til að styrkleikar hvers og eins fái að njóta sín með því að takast á við fjölbreytt verkefni út frá ólíkum sjónarhornum. Í Grunnskóla Drangsness hefur um nokkurra ára skeið verið unnið í smiðju tímabilum. Það er alltaf tilhlökkunarefni að hefja nýtt smiðju tímabil en á skólaárinu eru alltaf nokkrar fastar smiðjur s.s. eins og árshátíðarsmiðja sem mikil tilhlökkun er fyrir ár hvert en þá setur skólinn upp leikrit sem allir nemendur skólans koma að. 

Í vetur vorum við með tilraun með að þróa stuttar smiðjur, svokallaðar þjóðasmiðjur. Þar fræðast nemendur um eitthvað ákveðið land, tungumál og menningu þess. Smiðjan endar með matarveislu með mat, drykk, tónlist og fleira frá því landi en löndin sem verða fyrir valinu eru valin af mikilli kostgæfni. Á síðasta skólaári „heimsóttum“ við Spán, Marokkó og Tékkland. 

Það sem gerir skólann okkar líka einstakan er skólagróðurhúsið okkar en um 50 fm gróðurhús tilheyrir skólanum og er síaukin áhersla lögð á ræktun matjurta og útikennslu við skólann.

Þá er árleg matjurtasmiðja að vori þar sem við nýtum gróðurhúsið okkar mikið. Nú er sú nýbreytni að gróðurhúsið er komið með hita úr nýju borholunni og mun það skapa ný tækifæri í ræktunarstarfi skólans.

Árshátíð Grunnskóla Drangsness og miðstigs Grunnskóla Hólmavíkur verður haldin dagana 11. og 12. apríl í samkomuhúsinu Baldri á Drangsnesi. Sýnt verður nýtt frumsamið verk Ævintýraferð að miðju jarðar eftir ævintýri Jules Vernes í leikgerð og leikstjórn Kolbrúnar Ernu Pétursdóttur.

Fyrri sýning fimmtudaginn 11. apríl kl. 16:30. Miðaverð er 3000 kr. fyrir fullorðna og frítt fyrir börn yngri en 6 ára og yngri (veitingar innifaldar). UPPSELT

Seinni sýning föstudaginn 12. apríl kl. 16:00. Miðaverð 2000 kr. fyrir fullorðna og frítt fyrir börn yngri en 6 ára og yngri.

Hægt er að kaupa miða við inngangin en það væri gott ef fólk meldaði sig á viðburðinn ef það hyggst koma. Verið öll velkomin.

Viðburður á Facebook