Verið öll hjartanlega velkomin á jólaskemmtun Grunnskóla Drangsness þriðjudaginn 19. desember í húsnæði skólans við Aðalbraut kl. 17:00 – 18:30

Nemendur skólans flytja nokkur atriði, dansað verður í kringum jólatréð og jólasveinar líta í heimsókn. Boðið verður upp á heitt súkkulaði, kaffi og kökur.

Með jólakveðju

nemendur og starfsfólk GD

 

Grunnskóli Drangsness leitar að starfskrafti til þess að taka við ræstingum við skólann frá og með 1. desember 2023, um 22% hlutastarf er að ræða.

Í Grunnskóla Drangsness starfa að jafnaði um 10 nemendur og 3-4 starfsmenn, skólinn er á tveimur hæðum og eingöngu er unnið með vistvæn efni við þrifin. Nálgast má upplýsingar um skólastarfið í gegnum heimasíðu skólans skoli.drangsnes.is

Menntunar- og hæfnikröfur:
Sveigjanleiki, samviskusemi og jákvæðni. Laun eru samkvæmt kjarasamningi Sambands íslenskra sveitarfélaga og Verkvest.

Með umsóknum skal fylgja ferilskrá og meðmæli. Umsækjandi þarf að veita leyfi til upplýsingaöflunar úr sakaskrá.
Umsókn skal skila á netfangið skoli@drangsnes.is

Umsóknarfrestur er til og með 20. nóvember 2023
Allar nánari upplýsingar um ofangreint starf veitir Ásta Þórisdóttir skólastjóri í síma 4513436 / 6635319 og í gegnum netfangið skoli@drangsnes.is

Nemendur í grunnskólunum á Drangsnesi og Hólmavík sendu bátaskeyti út í Golfstrauminn með kærleiksríkum kveðjum til þeirra sem finna kunnu. Verkefnið er hluti af útikennslu- og náttúruviku 22. – 25. ágúst 2023 þar sem nemendur í 4. – 6. bekk hafa unnið saman að ýmsum verkefnum á Drangsnesi. Yngri nemendur á Drangsnesi gerðu einnig bátaskeyti svo allir 13 nemendur Grunnskóla Drangsness tóku þá þátt í verkefninu. Þetta verkefni er hluti af verkefni um hafstrauma, siglingaleiðir og Baska á Ströndum. Þeir sem kunna að finna einhvern bátanna eru beðnir um að hafa samband og senda tölvupóst um fundarstað á skoli@drangsnes.is 

Allir bátarnir hafa einhver jákvæð og falleg skilaboð til finnenda. Á bátunum er QR kóði sem vísar á þessa síðu. 

Nemendur lærðu um flöskuskeyti fyrri alda og ákveðið var að umhverfisvænna væri að senda skeyti með litlum timburbátum. Hver nemandi skrifaði eða teiknaði falleg og jákvæð skilaboð til þess sem myndi finna bátaskeytið. Samstarf var við Fab Lab Strandir á Hólmavík sem laserbrenndi skilaboðin á bátana. Hópurinn fór svo í góðu veðri á útfallinu að fleyta bátunum í sjóinn við Malarhornið og freista þess að þeir myndu ná í straum út í Húnaflóann.

Samkvæmt þjóðsögum á Grímsey á Steingrímsfirði að hafa sprungið út úr berginu á Malarhorni þegar tröllkerling nokkur stakk skóflu sinni í jörð og út sprakk eyjan og Uxinn hennar fylgdi með brotinu. Kerlingin hafði verið í kappi við tvö önnur nátttröll að moka Vestfirðina frá meginlandinu til að búa til tröllaparadís. Ekki tókst betur til en að öll tröllin þrjú urðu sólinni að bráð og má sjá Kerlinguna við sundlaugina á Drangsnesi en hin tvö í fjörunni í Kollafirði. 

Hér fyrir neðan má sjá nemendur á Drangsnesi með sína báta rétt fyrir fleytingu.

Verið öll hjartanlega velkomin á skólaslit Grunnskóla Drangsness skólaárið 2022-2023 fimmtudaginn 1. júní kl. 13:30-15:00

 

Skólastjóri fer yfir skólaárið

Nemendur yngri deildar syngja nokkur lög

Samsöngur

Veitingar að lokinni dagskrá

 

Komið er að árshátíðarsýningu Grunnskóla Drangsness en að þessu sinni verður leikverkið EmiLína frumsýnt í samkomuhúsinu Baldri. EmiLína er bræðingur tveggja verka úr smiðju sænska rithöfundarins Astrid Lindgren; barnasöngleiksins Emil í Kattholti og sögum af hinni stórkostlegu Línu langsokk. Hér mætast sem sagt tvær uppáatækjasamar persónur og allt getur gerst!

Leikskráin er hér að neðan á rafrænu formi.

Að sýningu lokinni verður boðið upp á veitingar. 

Öll hjartanlega velkomin!

Aðalbjörg Óskarsdóttir, Alla, féll frá þann 18. mars sl. eftir snörp veikindi sem hún tókst á við af miklu æðruleysi. 

Alla starfaði sem kennari við Grunnskóla Drangsness frá árinu 2003 og átti því 20 ára starfsafmæli í janúar síðastliðnum. Á þessum 20 árum kenndi Alla fjölmörgum nemendum og bætti sjálf í nemendahópinn en þau Halldór Logi, eiginmaður hennar, eignuðust Sigurbjörgu Halldóru, Guðbjörgu Ósk og Friðgeir Loga á árunum 2004-2012 sem öll hafa numið við skólann. Alla starfaði sem trúnaðarmaður, umsjónarkennari og skólastjóri við skólann ásamt því að taka virkan þátt í félagsstarfi kennara sem stjórnarmaður í Kennarafélagi Vestfjarða. Öll þessi störf vann hún af einurð og var ávallt tilbúin að leysa verkefni, stór og smá ásamt því að leggja öðrum lið. 

Eitt af mikilvægustu hlutverkum Öllu hér við skólann var að taka að sér að vera minniskubbur hans, stofnanaminnið sjálft sem reyndist algjörlega ómetanlegt. 

Í gegnum farsælan starfsferil Öllu voru starfsmannaskipti nokkuð tíð eins og gengur og gerist í fámennum skólum á landsbyggðinni og þess vegna var hlutverk hennar í skólanum afar mikilvægt. Öll þau sem störfuðu með Öllu eða kynntust henni í gegnum samstarf á milli skóla hér á svæðinu eru henni innilega þakklát fyrir hlýjar og góðar móttökur en ekki síst fyrir að leiða okkur inn í sögu og hefðir skólans og staðarins sem henni þótti svo ógnarvænt um. Fyrir það erum við samstarfsfólk hennar óendanlega þakklát. 

Alla var kennari af lífi og sál, hún gaf sig alla í starfið og sýndi nemendum sínum mikla umhyggju. Stelpurnar muna eftir því hvað hún var góð í að flétta og börnin öll hvernig hún gaf þeim orku bara með því einu að koma inn í skólastofuna og brosa. Hún tók þátt í leikjum barnanna, huggaði og sýndi öllum hlýju með mjúku og góðu faðmlagi. Hún var glaðlynd og blíð, eiginleikar sem skipta mjög miklu þegar unnið er með börnum og ungmennum. Sem samstarfsmaður var Alla algjörlega einstök, hún var jákvæð og röggsöm ásamt því að taka virkan þátt í því að gera skólann að skapandi og skemmtilegum vinnustað. Allt starfið í kringum árshátíð skólans, þegar ár hvert er sett upp leikrit í samkomuhúsinu Baldri, bar Alla uppi. Þarna var hún í essinu sínu; leikstýrði, setti upp sviðið, kom að öllu sem þurfti til þess að gera eftirminnilega sýningu að veruleika auk þess að baka pizzur ofan í allan leikhópinn daginn fyrir frumsýningu. 

Við munum taka Öllu okkur til fyrirmyndar og halda áfram því góða starfi sem hún vann hér við Grunnskóla Drangsness, við hefðum viljað njóta krafta hennar svo miklu lengur en við munum tryggja að minning Öllu lifi hér í skólanum um ókomna tíð. 

Elsku Alla okkar 

Elsku yndislega, brosmilda, jákvæða, bjarta, söngelska, lausnamiðaða og úrræðagóða Alla okkar.

Hjartað okkar er í molum og við eigum erfitt með að sætta okkur við bitran raunveruleikann, að þú sért farin frá okkur. Síðustu mánuðir hafa verið erfiðir fyrir ykkur fjölskylduna en jákvæðni og æðruleysið einkenndi ykkur fjölskylduna og þá sérstaklega þig allan þennan tíma. Við vorum allar svo bjartsýnar á að þú myndir sigrast á þessum veikindum. Síðasta heimsókn þín í skólann í janúar til okkar var svo dýrmæt og mun lengi dvelja í hjörtum okkar. Þá varst þú að fara suður til læknis og talaðir um að þetta yrði skottúr suður og þú yrðir komin aftur heim eftir nokkra daga, en svo varð því miður ekki. 

Elsku Alla okkar nú er komið að erfiðri kveðjustund og óhugsandi að við munum ekki fá að heyra þig hlæja, syngja eða sjá fallega brosið þitt. Þú munt ávallt vera í hjörtum okkar og við munum gera okkar allra besta til að halda minningu þinni á lofti innan skólans, skólans sem þér þótti svo vænt um og starfaðir við síðastliðin 20 ár.

Elsku Halldór, Sigurbjörg, Guðbjörg og Friðgeir, fjölskylda og tengdafjölskylda við sendum ykkur okkar dýpstu samúðarkveðjur, ljós og styrk á þessum erfiðu tímum. 

Minningin um yndislegu Öllu okkar mun lifa 

Marta, Heiðrún og Ásta

Við hvetjum þá sem vilja minnast Öllu að leggja krabbameinsfélaginu Sigurvon lið með því að styrkja það 0154-26-002010 Kt. 470102-4540.

Ljósmyndir úr safni starfsmanna skólans

Fimmtudaginn 15. desember höldum við okkar árlegu jólaskemmtun í Grunnskóla Drangsness. Börnin munu flytja skemmtiatriði, boðið verður upp á jólalegar veitingar og að lokum verður dansað í kringum jólatréð. Það er aldrei að vita nema nokkrir hressir jólaveinar heimsæki skólann og þá er hægt að treysta því að þeir hafi eitthvað í pokanum sínum handa börnunum. 

Skemmtunin hefst stundvíslega kl. 17:00 og lýkur kl. 18:30

Öll hjartanlega velkomin! 

 

Nemendur Grunnskóla Drangsness sóttu jólatré í skógrækt kvenfélagsins Snótar nú í vikunni. Um árlega hefð er að ræða og verður jólatréð sett upp á jólaskemmtun skólans þann 15. desember nk. Nemendur hjálpast að við að velja tréð ásamt kennurum, saga tréð og koma því í skólann. Við notum einnig tækifærið til þess að gera okkur glaðan dag, leika okkur í skóginum, fræðast um tré og drekka kakó. Í ár voru það þau Guðbjörg Ósk nemandi í 9. bekk og Friðgeir Logi í 5. bekk sem söguðu niður tréð og fengu til þess aðstoð frá Heiðrúnu Helgu kennara. Öll börnin fengu að klippa greinar til þess að skreyta með og áttu ánægjulega stund í skóginum.