Nemendur í yngstu deild, 1. og 2. bekk, vinna nú að fjölbreyttum verkefnum m.a. í textíl. Þau eru með hugann við fuglana og vorið sem er á næsta leiti. Í verkefnavikunni var eitt af markmiðunum að búa til dreka og nú hangir einn stór og fallegur pappírsdreki í glugga kennslustofunnar. Börnin hafa sagt og skrifað drekasögur. Tvö þeirra eiga ættir að rekja til Trutnov í Tékklandi þar sem stór og mikill dreki bjó eitt sinn rétt utan við bæinn en hlaut grimm örlög þegar bæjarbúar svældu hann út úr helli sínum og drápu enda ekki margir sem vilja hafa eldspúandi dreka í grennd við sig. Drekinn sem börnin luku við í dag er svo góður að af honum stafar engin hætta svo hann fær að lifa góðu lífi hér í Grunnskóla Drangsness. 

Nú fer fram verkefnavika í lok miðannar og vinna nemendur að fjölbreyttum verkefnum ásamt því að taka kannanir og skila af sér ritgerðum og öðru sem námsmat annarinnar samanstendur af. Við hvetjum foreldra til þess að styðja börn sín við að vera sem best undirbúin þessa vikuna, nærast og hvílast því þá gengur allt svo miklu betur. Í lok næstu viku hefst svo vetrarfrí en að því loknu munu umsjónakennarar boða foreldra til viðtals. 

Skólaárinu er skipt upp í nokkur smiðjutímabil og er nú einni smiðjunni að ljúka en í henni var viðfangsefnið eldur skoðað út frá ólíkum sjónarhornum. Við rannsökuðum m.a. hvaða efni brenna, skrifuðum og sögðum sögur, veltum fyrir okkur uppruna eldsins og mikilvægi hans í menningu okkar. Miðdeildin rannsakaði sérstaklega skógareldana í Ástralíu en yngsta deildin fræddist um brunavarnir. 

Í dag föstudaginn 31. janúar héldu börnin í Grunnskóla Drangsness þorrablót og buðu hreppsbúum öllum í heimsókn. Boðið var upp á þorramat, yngri deildin söng nokkur þorralög og allir dönsuðu skottís og hókí pókí. Í lokin buðu nemendur og kennarar upp á grínatriði, myndbönd þar sem nemendur gerðu grín að kennurum og kennarar að nemendum. Við þökkum gestunum fyrir komuna og óskum öllum góðrar helgar!

Þriðjudaginn 21. janúar vorum við svo ljónheppin að fá Gunnar Helgason rithöfund og leikara í heimsókn. Verk Gunnars þekkja nemendur vel enda hafa bækur hans verið lesnar upp til agna af mörgum þeirra, það var því um nóg að ræða í heimsókn Gunnars. Við erum Gunnari afskaplega þakklát fyrir heimsóknina, spjallið, lesturinn og samveruna. Eftir spjall um bókmenntir og upplestur bauð Alla skólastjóri okkur öllum upp á ljúffenga kjötsúpu. Þessi heimsókn líður börnunum seint úr minni og við hlökkum öll til næstu bókar eftir þennan frábæra rithöfund. 

 

Nýtt ár er gengið í garð og það fer vel af stað. Því miður hefur veður verið slæmt en skólahald þó ekki fallið niður. Börnin una vel við sitt og verkefnin framundan eru mörg og spennandi. Gunnar Helgason rithöfundur mun heimsækja okkur í janúar og við stefnum að því að halda hér þorrablót fyrir börnin þegar þorrinn hefst. 

Kæru vinir og velunnarar, við óskum ykkur gleðilegra jóla og farsældar á nýju ári.

Við erum innilega þakklát fyrir velvild sem okkur hefur verið sýnd á árinu, notalegar samverustundir og skemmtilegar gestakomur. 

Í dag höldum við í jólafrí eftir vel heppnaða jólaskemmtun og margar góðar samverustundir í desember.

Með jólakveðju

starfsfólk og nemendur Grunnskóla Drangsness

Nú er síðustu smiðju ársins að ljúka en í henni hafa nemendur skólans unnið að ólíkum verkefnum sem tengjast vetrinum og jólum. Nemendur yngri deildar skrifuðu vetrarsögur og bjuggu til „vetur í kassa“. Ýmis verkefni í aðdraganda jóla hafa einnig verið unnin; eldri deild setti saman hljómsveit sem tróð upp á jólaskemmtuninni, í list- og verkgreinum var nóg um að vera en að jólasmiðjunni komu auk kennara þau Unnur Ágústa, Linda og Tryggvi. Eftir áramót hefst ný smiðja sem ber titilinn Eldsmiðja en eins og nafnið gefur til kynna munu nemendur vinna að fjölbreyttum verkefnum í tengslum við eldinn sem ætlunin er að kynnast frá ólíkum hliðum. 

Skólaárið 2019-2020 hefur göngu sína Skólsel við Grunnskóla Drangsness. Umsjónarmaður Skólasels er Tryggvi Ólafsson og verður boðið upp á notalega dagskrá eftir að hefðbundnum skóladegi lýkur mánudaga-fimmtudaga. Foreldrar barna í yngstu deild (1.-3. bekkur) eru hvattir til þess að kynna sér starfsemina og skrá sín börn fyrir föstudaginn 23. ágúst nk. Allar frekari upplýsingar veitir skólastjóri í gegnum netfangið skoli@drangsnes.is eða í síma 451-3436. Verð fyrir hverja klukkustund er 300 kr., miðdegishressing er innifalin og boðið upp á 50% systkinaafslátt.

 

 

Grunnskóli Drangsness verður settur miðvikudaginn 21. ágúst nk. en kennsla hefst skv. stundaskrá fimmtudaginn 22. ágúst. Foreldrar barna í 1.-4. bekk eru beðnir um að senda inn umsókn um vist í skólaseli hið fyrsta eða fyrir föstudaginn 16. ágúst. Við hvetjum foreldra einnig til þess að virkja lykilorð sitt að námsumsjónarkerfinu Námfúsi þar sem m.a. má fá aðgang að stundaskrám o.s.frv.

Við hlökkum til samstarfsins framundan, nýrra og spennandi verkefna á skólaárinu!

Með síðsumarkveðju

skólastjóri