Í dag fræddi hún Lísabet Guðmundsdóttir fornleifafræðingur okkur um starfið sitt, og tóftirnar í Sandvík sem þau eru að grafa upp um þessar mundir. Við skoðuðum þúsund ára nagla og bein sem þau hafa verið að finna og allir fengu að prufa að nota litla múrskeið til að grafa með. Eldri deild teiknaði umhverfið og yngri tíndu ber og léku sér í fjörunni. Hér að neðan eru nokkrar myndir og svo hlekkur á video neðst 🙂 Góða helgi.
Kæru nemendur og foreldrar, Grunnskóli Drangsness verður settur fimmtudaginn 20. ágúst kl. 10:00.
Við hlökkum til að sjá ykkur!
Við höfum verið einstaklega heppin með veður þessa vikuna en nú hafa börnin flesta daga lagt stund á nám sitt útivið. Þriðjudaginn 19. maí var haldið í skólalundinn okkar í Bjarnarfirði þar sem Arnlín skógræktarráðgjafi kenndi okkur ýmislegt gagnlegt og hélt áfram að stýra vinnu við mælingar og annað er viðkemur skógræktinni í skólalundinum. Patricia jógakennari fylgdi okkur í skólalundinn og bauð okkur þar næst í heimsókn að Háabakka þar sem við grilluðum og fórum í skemmtilega útileiki. Í dag var haldið í Sandvík þar sem börnin skoðuðu m.a. fuglalíf; hreiðurgerð tjaldsins og hrossagauksins ásamt fleiru. Í næstu viku verður Guðný Rúnarsdóttir listgreinakennari gestakennari en hún er jafnframt nýráðin skólastjóri skólans. Við hlökkum til að taka á móti henni og halda áfram að nema, upplifa og skapa úti.
Það er mikið um að vera allt í kringum okkur og ekki síst í skólanum.
Í næstu viku verður verkefnavika en þá þreyta nemendur próf og sinna öðrum verkefnum ásamt því að fara í skólasund eftir nokkuð langt hlé. Hjördís Klara íþróttakennari verður með okkur eins og áður og sér um sundprófin í öllum árgöngum. Nú er sauðburður hafinn og börnin fylgjast spennt með, við munum örugglega líta við í fjárhúsunum eins og alltaf á vorin. Börnin í yngstu deild eru næstum því útskrifuð úr íslenskum fuglum en í dag bjuggu þau til fuglagrímur og unnu að upplýsingaspjöldum um fuglana sem þau hafa valið sér. Vorið er skemmtilegur tími og tíminn líður á ógnarhraða þegar mikið er að gera.
Miðvikudaginn 22. apríl var Dagur jarðar og tóku nemendur skólans sig til og héldu í skrúðgöngu af því tilefni með fullar hjólbörur af tómatplöntum og sólblómafræjum. Plönturnar hafa nemendur ræktað upp af fræi og var þeim komið fyrir í búðinni þar sem íbúar gátu sótt sér plöntu.
Við sendum okkar allra bestu sumarkveðjur héðan frá Drangsnesi. Í tilefni sumarkomunnar sungu nemendur í 1. og 2. bekk Nú er vetur úr bæ (þjóðlag við texta Jónasar Hallgrímssonar). Við þökkum fyrir veturinn og vonum að sumarið verði blítt og fagurt eins og stendur í textanum.
Yngri deildin mun fást við fugla næstu vikurnar og hófst námið á fuglaskoðunarferð í Sandvík. Við vorum einstaklega heppin með veður og skráðum hjá okkur tíu ólíkar tuglategundir sem við sáum í ferðinni. Þar á meðal voru álftir, rjúpur, grágæsir, spóar, lóur, hrossagaukar og skógarþrestir. Tvær fallegar heiðlóur tóku á móti okkur og kvöddu okkur með fallegum söng að lokinni skoðunarferðinni. Nú þegar vorið er loksins komið munum við nýta hvert tækifæri sem gefst til þess að færa kennsluna út undir beran himin – þar er best að læra!
Árshátíð Grunnskóla Drangsness sem halda átti þann 3. apríl hefur verið frestað vegna samkomubanns. Ný dagsetning verður auglýst þegar hún liggur fyrir.
Skólastarf mun taka einhverjum breytingum fyrir páska en í stað árshátíðarsmiðju munu nemendur fara í matjurtarsmiðju.
Nú er vorönnin hafin og mörg spennandi verkefni framundan. Börnin í yngstu deild hafa verið að æfa sig í skrift og gengur ljómandi vel. Eins og flestir vita hefur ekki alltaf verið gott veður í vetur en nú ætti það að fara að breytast. Til þess að flýta fyrir vorinu og óska eftir betra veðri ákváðu nemendur í yngstu deild að blíðka góuna með því að búa til óróa úr trjágreinum og rauðri ull sem hanga nú í gluggum skólans. Við vonum að góan verði okkur góð og hlökkum til þess að njóta vorsins þegar það loksins lætur sjá sig. Nemendur skólans hefur í nógu að snúast við að æfa leikverkið sem frumflutt verður á árshátíð skólans föstudaginn 3. apríl nk. og miðdeildarstelpurnar eru að smíða leikmynd ásamt því að vinna í leikgerðinni.
Undanfarin ár hafa nemendur Grunnskóla Drangsness gengið í fyrirtæki á Drangsnesi og sungið fyrir starfsfólk og gesti. Í ár sungu nemendur lögin: Nú gaman, gaman er, Dýravísur og Meistari Jakob. Góður rómur var gerður að söng nemenda og var þeim allstaðar vel tekið. Malarkaffi bauð svo upp á hádegisverð áður en nemendur fóru heim að undirbúa sig fyrir öskudagsballið sem haldið var í skólanum.
Nú er vetrarfrí í skólanum og mæta allir sprækir næstkomandi þriðjudag 🙂
