Í tilefni af því að 21. apríl 2021 voru liðin 50 ár frá því að fyrstu handritin komu heim frá Danmörku stóð grunnskólanemendum til boða að taka þátt í handritasamkeppni Árnastofnunar. Nemendur höfðu frjálsar hendur og af þeim hátt í hundrað handritum sem bárust í keppnina voru efnistökin afar fjölbreytt. Nemendur í eldri deild GD tóku þátt í samkeppninni en í kjölfar heimsóknar fræðara Árnastofnunnar þeirra Snorra og Jakobs hófu nemendur að kynna sér heim handritanna, efniðvið og aðferðir. Efni af vefnum Handritin til barnanna kom sér afar vel í þessu ferli en nemendur skoðuðu einnig Íslensku Teiknibókina í útgáfu Guðbjargar Kristjánsdóttur listfræðings ásamt fleiru. Að lokum völdu nemendur sér texta sem tengist Drangsnesi og Grímsey og efnivið en fyrir valinu varð annars vegar lambaskinn og næfurkolla. 
Þær Guðbjörg Ósk og Kristjana Kría Lovísa unnu saman að því að skrifa upp brot af þjóðsögunni af tilurð Kerlingarinnar og Grímseyjar á skinn og máluðu mynd af bæði Kerlingunni og eyjunni. Sara Lind valdi brot úr ljóði Björns Guðmundssonar frá Bæ, Grímsey á Steingrímsfirði, sem birtist m.a. í safninu Kvæðaperlur úr Kaldrananeshreppi. Ljóðið skrifaði Sara Lind upp á næfurkollu ásamt því að mála mynd af eyjunni okkar, Grímsey. 
Síðasta vetrardag var tilkynnt hvaða handrit fengu sérstaka viðurkenningu og var eitt þeirra handrit Söru Lindar Magnúsdóttur.  
Eins og segir á heimasíðu Árnstofnunar var handritasamkeppnin haldin í samstarfi við Sögur – verðlaunahátíð barnanna en í júní verður eitt handrit verðlaunað sem Ungdómshandritið 2021 á Sögum verðlaunahátíð barnanna.
Dómnefnd var skipuð þeim Gísla Sigurðssyni, Arndísi Þórarinsdóttur og Goddi.
Við óskum Söru Lind innilega til hamingju með viðurkenninguna. 

Nemendur hafa undanfarnar vikur unnið að leirvösum og bókamerkjum í myndmennt og nýsköpun. Þau notuðu bæði steinleir og jarðleir í vasana auk þess sem pulsuaðferð var notuð við gerð sumra vasanna og plötuaðferð við aðra. Bókamerkin eru unnin þannig að vatnslitapappír er dýft ofan í vatn þar sem litur hefur verið settur í eftir kúnstarinar reglum (eða tilviljunum) þannig myndast einstaklega fallegt marmara munstur. Næsta föstudag 23. apríl verða þessir hlutir til sölu í Búðinni hér á Drangsnesi – ágóði mun renna til kaupa á skólapeysum.

• 

• 

• 

Í gær miðvikudag varð sú nýjung í skólastarfinu að nemendur og starfsfólk fær hádegismat á Malarkaffi. Þar matreiðir Óskar yndislega rétti og bauð okkur upp á plokkfisk með rúgbrauði sem börnin voru sérlega hrifin af. Boðið verður upp á hádegismat alla daga nema föstudaga út skólaárið.

Við erum hæstánægð með þessa nýjung og allir saddir og sælir þegar þeir koma í skólann eftir hádegismat.

• 

• 

Vegna breyttra sóttvarnaráðstafana og reglna þurfum við því miður að fresta árshátíðarsýningunni FÍASÓL sem átti að fara fram í kvöld, 25. mars.

Við vonum svo sannarlega að við getum haldið sýninguna með pompi og prakt eftir páskafrí eða síðar í vor.
Nemendur hafa verið duglegir að æfa söng og leik síðustu þrjár vikur undir leikstjórn Aðalbjargar Óskarsdóttur og Karenar Aspar Haraldsdóttur. Foreldrar spreyttu sig einnig í leikrænum tilburðum 🙂

Með ósk um gleðilega páska.

Nú er árshátíðarsmiðja í fullum gangi hjá okkur hér í Grunnskóla Drangsness. Leikrit um hana Fíusól varð fyrir valinu að þessu sinni og sýningin mun fara fram í Baldri (samkomuhúsinu) fimmtudaginn 25. mars klukkan 19.00. Vegna takmarkana verða gestir ekki fleiri en 50 (börn fædd 2005 og síðar undanskilin) að þessu sinni og verður tveggja metra reglan (annars grímur) í hávegum höfð. Við erum mjög spennt!

• 

• 

• 

• 

Við erum stolt af nemendum okkar í 7. bekk því þær unnu báðar til
verðlauna í Stóru upplestrarkeppninni sem fram fór að Hótel Laugarhóli 4. mars. Þar mættust nemendur frá Drangsnesi, Hólmavík og Reykhólum og allir stóðu þeir sig með prýði – til hamingju! – Sigurverarar að þessu sinni voru:
1. sæti: Kristjana Kría nemandi í Grunnskóla Drangsness 2. sæti: Kristbjörg Lilja nemandi í Grunnskólanum á Hólmavík 3. sæti: Guðbjörg Ósk nemandi í Grunnskóla Drangsness

Hér má hlusta á umfjöllun um keppnina í Mannlega þættinum á RÚV

Takk fyrir góðar mótttökur, Sigríður og Ragnar, ekki amarlegt að koma í skíðakennslu til ykkar í Skíðafélag Strandamanna, Selárdal!

Smellið hér til að hlusta á Jólaskemmtunina.

Jólaskemmtun Grunnskóla Drangsness var haldin með breyttu sniði í ár vegna heimsfaraldursins Covid-19. Í stað þess að fylla húsið af góðum gestum tóku aðeins nemendur og kennarar þátt en Kristín Einarsdóttir okkar kona á Ströndum var svo elskuleg að koma með upptökutækið sitt svo allir gætu fengið að heyra yngstu börnin syngja við undirleik þeirra eldri, spjalla um jólin, hitta bjúgnakræki í gegnum Zoom og dansa í kringum jólatréð. Lögin sem sungin voru: Jólin eru okkar, Vánoce, Vánoce přicházejí (tékkneskt jólalag) og Jingle Bells.

Með jólakveðju frá nemendum og starfsmönnum Grunnskóla Drangsness

Miðvikudaginn 18. nóvember var blásið til málþings í skólanum en það voru nemendur í eldri deild (7.-9. bekk) sem stóðu fyrir því. Málþingið er hluti af verkefninu Deilt um orkuna af vefnum Náttúrufræði á nýrri öld (NANO) en eftir að hafa kynnt sér orkuver af ólíku tagi settu nemendur sig í spor persóna sem hafa ólíkra hagsmuna að gæta; forstjóra orkufyrirtækis, náttúruverndarsinna og bæjarfulltrúa. Þessar persónur héldu síðan erindi á málþinginu og komu sínum sjónarmiðum á framfæri. Aðrir nemendur og starfsmenn skólans beindu að lokum spurningum til þeirra sem héldu erindi á málþinginu og urðu umræður mjög fjörugar. Skemmtilegt verkefni sem reynir svo sannarlega á hæfni nemenda til þess að setja sig í spor annarra og geta fært rök fyrir máli sínu ásamt fleiru.

Í dag er Dagur íslenskrar tungu, 16. nóv. 2020, að því tilefni gerðu nemendur í Grunnskóla Drangsness þrjú tónlistar/ljóða-myndbönd, endilega skoðið þau 🙂

Flutningur á frumsömdum rapp texta og myndband. Nemendur: Kristjana Kría, Sara Lind, Elísabet Lea, Júlía og Þorsteinn. Texti (eftir nemendur eldri deildar) :

Já, ég er sko býfluga og sef á Malarhorni

hva ætlaru að gera ef ég sting þig með litlu horni,

búin að fljúga í allan dag er orðinn þreytt,

enda er ég lika orðinn frekar beitt. 

Gul, svört og röndótt og

frekar feit

sting þig í lærið

æjæj greyið þarftu mömmu?

————– //// ————————————————————————

Ljóðaupplestur og myndband – ljóð: Norður Strandir eftir Ingimar Karl Elíasson.

Nemandi: Guðbjörg Ósk.

Norður Strandir liggja leiðir

langar götur út með sjó.

Húnaflói hugann seiðir

heimabyggðar kyrrð og ró.

Sígur alda að svörtum björgum

sömu fjöllin standa vörð.

Eins og fyrir öldum mörgum,

Ennishöfði, Drangaskörð.

Sé ég ótal undraheima

er ég kem í dalinn minn.

Fornar sagnir sögur geyma

um Svan er gekk í fjallið inn.

Gleði vekja gömul kynni,

grænu flosi skrýdd er jörð.

Aldrei hverfur mér úr minni

minningin um Steingrímsfjörð.

————– //// ————————————————————————

Söngur og stafatré.

Nemendur í yngri deild: Katrín Halla, Marianna Fiserova, Friðgeir Logi og Tomás Fisera.

Siglingavísur – íslenskt þjóðlag við texta Einars Benediktssonar

Austankaldinn á oss blés,

upp skal faldinn draga.

Þó velti aldan vargi hlés,

við skulum halda á Siglunes.

Haustvísa. –  Þjóðlag frá Belgíu.  Texti: Herdís Egilsdóttir

Hvert er horfið laufið

sem var grænt í gær?

Þótt ég um það spyrji

verð ég engu nær.

Blöðin grænu hafa visnað,

orðin gul og rauð.

Ef ég horfi miklu lengur

verður hríslan auð.

Hvínandi vindur – Lag og texti: Aðalsteinn Ásberg Sigurðsson

Hvínandi hvínandi vindur

hvaðan ber þig að?

hvert ertu‘ að fara

viltu segja mér það?